Botohet monografia “Luleborë Sharri” – Autorë, Demir Reshiti e Ibrahim Skenderi

Botohet monografia “Luleborë Sharri” – Autorë, Demir Reshiti e Ibrahim Skenderi

Dragash, 24 maj 2016 – Para 10 vitesh, kur shënohej 15-vjetori i themelimit të Klubit Letrar “Luigj Gurakuqi” nga Dragashi, ishte marrë iniciativa dhe vendimi për hartimin e një monografie, madje që atëherë ishte kryer pjesa më e madhe e punës, por për shkaqe financiare kjo monografi kishte mbetur pa u botuar. Sot, në shënimin e 25-vjetorit të klubit, monografia e ka parë dritën e botimit dhe, siç thotë për Radio Sharrin, njëri nga autorët e saj – Demir Reshiti, në këtë çerekshekull ishte vendosur nga kryesia e klubit që kjo monografi të botohej medoemos. “Përfundimisht i përvolëm krahet dhe e plotësuam këtë vendim të para një dekade. Krejt kjo, falë disa njerëzve të vullnetit të mirë, të cilët nuk janë biznesmenë por vetëm dashamirë të artit”, tha Reshiti.
Klubi Letrar “Luigj Gurakuqi” ishte themeluar nga një grup i të rinjve opojanë, të cilët reflektuan talent në të shkruar, në krijimtari poetike apo publicistike. Themelimi i Klubit Letrar ishte një ngjarje me rëndësi historike dhe sot, me qëllim të afirmimit të kësaj ngjarjeje historike si vlerë që la gjurmë në kulturën e kësaj treve, dy krijues opojanë, anëtarë dhe themelues të Klubit, Demir Reshiti dhe Ibrahim Skenderi, janë angazhuar në hartimin e një monografie kushtuar 25 vjetorit të aktivitetit të Klubit. Monografia me titullin simbolik “Luleborë Sharri” sot ka dalë nga shtypi, me 140 faqe përmbajtjeje dhe me një dimension të veçantë, i shtypur në letër kualitative dhe me album fotografish në kolor.
Përurimi i monografisë është paraparë të bëhet më 4 qershor 2016, në kuadër të Manifestimit tradicional letrar “Sofra e Ymer Prizrenit”, në fshatin Zgatar të Opojës.