Nga: Silvana BEGAJ
• Të dashur bashkëkombës të mi shqiptarë! Jam në hall sepse nuk po e lexoj dhe as po e kuptoj dot Evropën! Kur flasin përfaqësuesit e saj japin imazhin e një Shqipërie në zhvillim gati gati me standarde Evropiane. Kur është puna për çeljen e negociatave për anëtarësimin në BE dalin përfaqësuesit dhe thonë saktësisht të kundërtën, por në mënyrë më të moderuar duke shtuar detyrat e shtëpisë.
Kur shqiptarët kërkojnë ndihmë nga Evropa, të marrim shembullin e shëndetësisë, Evropa i kthen nga kanë ardhur me motivimin që Shqipëria sot ka mjekësinë në nivelin evropian prandaj këto operacione, mjekime, apo terapi mund ti ndjekin në vendin e tyre. Çdo shtet i Evropës ka në konventën e refugjatit që cilido shtetas jashtë Bashkimit Evropian mund të përfitoj statusin e rezidentit nëse përmbush kushtet e mëposhtme si:mungesa e sigurisë, shëndetësisë, apo vjen nga vendet e luftës etj.
Për shëndetësinë kryesisht vijnë ata që kanë sëmundje të veçanta dhe të rënda ose kanë mjekime dhe trajtime shumë të shtrenjta ose kur kanë fëmijë të sëmurë ose me aftësi të kufizuara. Menjëherë të vjen një letër ku të shpjegon që Shqipëria është një vend që po aderon të futet në Bashkimin Evropian dhe kushtet e mjekësisë janë brenda standardeve prandaj; Kthehuni në vendin tuaj! Ama sot, po të njëjtin arsyetim po e përdorin për të na mbyllur dyert. Ne jemi rrezik për Evropën sepse nuk i kemi kushtet për të trajtuar rastet e virusit Covid19. Ndajeni mendjen tani: I kemi apo nuk i kemi?
Ku është diferenca nëse një Evropian është me Covid dhe udhëton me një shqiptar që udhëton? Nëse Covid është rrezik duhet të jetë njësoj për të gjithë. Të mbyllen rrugët me të gjithë ose Hapni rrugët me Shqipërinë! Kur flasim për sigurinë në shtetet evropiane na thonë se vendi juaj është në listën e vendeve të sigurta, por lejon të shkruhen e shpërndahen artikuj për një Shqipëri narkotike dhe me një mafie të fuqishme. Informacioni për Shqipërinë është negativ. Pra, dikush i bën “hyzmet” që kjo teori e poshtërimit të shqiptarëve të marr dhënë në tërë globin. Askush nuk flet për bukuritë e Shqipërisë, për mikpritjen shqiptare, për çmimet e ulëta, për ushqimet bio e të shijshme. Jo, ato harrohen madje fshihen me kujdes mos të ngeli asnjë gjurmë.
Dhe nëse Shqipëria qenka kaq e rrezikshme apo kaq e pazhvilluar sa për tu lënë jashtë (çuditërisht gjithmonë), përfaqësuesit tuaj në Shqipëri pse nuk e evidentojnë dhe ta bëjnë problem deri në zgjidhje të këtyre situatave? Ata janë pothuajse kudo, madje kanë qenë dhe në parlament dhe japin vetëm vlerësime pozitive. E nëse ju nuk i respektoni rregullat të parët, pse ti respektojmë ne? Ne nga ju kemi mësuar deri më sot duke ju marri si model. Por ta dini, shumë gjëra i gjetëm midis jush; si krimin, drogën, shfrytëzimin që ne nuk i kishim më parë.
Na lini të fundit në radhë dhe na kontrolloni çdo gjë nëpër kufij. Doni krahë pune nga ne dhe mezi na pajisni me leje qëndrimi duke shpikur lloj-lloj marifetesh gjoja metoda të reja, me leje afatshkurtra.
Keni mësuar që tek ne shiten diploma madje blini edhe vet dhe shpesh vini pikëpyetje në nivelin e arsimit tonë etj. Në Shqipëri lindën këto fenomene, duke shfrytëzuar mungesën e shtetit, por ama kemi dhe specialistë në fusha të ndryshme që po bëjnë jehonë nëpër botë. Me ato kushte, kemi dhe doktorë inxhinierë, ekonomistë, juristë ndër më të mirët, madje universitete me emër si Cambridge, Oxford, Harvard mbledhin studentë shqiptarë. Specialistë të vjetër janë nga më të kërkuarit në tërë globin.
Por, vërtet ne i kemi të tilla fenomene, por a nuk ka çdo shtet? Po ju? Po ua them unë! I keni me tepricë, madje shqiptarët vijnë mbrapa jush në të gjitha paudhësitë e njerëzimit. Por tashmë shqiptarët ju njohin! Ju jeni fallco, ndryshe hiqeni dhe ndryshe jeni! Ju jeni vetëm propagandë dhe ekspozim fallco! Shqiptarët janë shumë më origjinal se ju! Ne jemi njerëzit e rregullt që sa kemi filluar t’ju imitojmë!
Ne kemi mikun dhe lekun, ju keni ”personin e kontaktit” dhe ”dhuratat”
Ne kemi vrasje për motive të dobëta, ju keni vrasje midis getove ku policia as nuk futet dot.
Ne kemi media të blerë, ju keni ”media përkrahëse”
Ne kemi drogë në qarkullim, ju keni një numër të lartë përdoruesish
Ne kemi korrupsion të dukshëm, ju keni korrupsion zotërinjsh në nivele të larta e të heshtur!
Prandaj, nuk jeni më mirë se ne! Ne jemi më mirë se Ju! Kemi histori e cila na është vjedhur e deformuar nga Ju për interesat tuaja të errëta. Ne në darkë kur mbyllim derën e shtëpisë kemi një familje që na pret se jemi popull kolektiv e familjarë, kurse ju me ndonjë kafshë shtëpiake. E nëse mendoni se jeni më të pasur se ne ,përsëri e keni gabim. Ne jemi të keqmenaxhuar, por jo të varfër. Ne jemi të vjedhur, por jo të varfër. Na përkrahni se keni për të përfituar shumë nga shqiptarët! Nuk kemi qenë perandori, por jemi me shumë histori. Nuk kemi pushtuar popuj të tjerë, por edhe pse jemi viktima të pushtimeve e copëtimeve kemi ruajtur gjuhën, kulturën, traditën dhe vetitë më të mira të njeriut.
Dijeni se jemi njerëz madje shumë civilë e të qytetëruar. Mësojini këto gjëra se janë me interes për Ju e për Ne e mbi të gjitha Hapni rrugët me Shqipërinë!
![](http://radio-sharri.info/wp-content/uploads/2020/06/beki-trade-radio-sharri-dragash.jpg")