Dragash, 11 janar 2022 – Ndonëse dukej në parim se gjithçka po shkonte mirë koalicioni LV – LDK në Dragash, ka kohë që në publik kishin rrjedhur informata se ky koalicion nuk do t’ketë jetë. Sot përfundimisht ka rezultuar se “thashethëmet” kishin bazë të fortë informacioni.
Një komunikatë që ka hedhur sot në Facebook, Lëvizja Vetëvendosje në Dragash njofton se nuk do të bashkëqeverisë me Lidhjen Demokratike të Kosovës por do të mbetet në opozitë. “Dega e LDK-së në Dragash, përmes takimeve të zhvilluara së fundmi, përfshirë edhe krerët e saj, e përgjatë ditës së djeshme edhe me kryetarin e Komunës, na u bë e qartë se nuk e kanë seriozisht ndryshimin në komunë, duke mos respektuar marrëveshjen për koalicionin qeverisës. Lëvizja Vetëvendosje do të jetë në opozitë përgjatë katër viteve të ardhshme, duke e mbrojtur interesin publik e duke e përcjellë me vëmendje secilin hap që do ta ndjekë qeverisja aktuale”, thuhet mes tjerash në postim.
Postimi pa ndërhyrje në Facebook:
KOMUNIKATË
Si qendër e Lëvizjes VETËVENDOSJE! në Sharr, në balotazhin e 14 nëntorit, vendosëm që të kontribuojmë për ndryshimin që i duhej komunës tonë. Në suaza të kësaj, me partinë fituese të zgjedhjeve, LDK-në, kemi nënshkruar një marrëveshje koalicioni e cila fokusin themelor e ka tek parimet e qeverisjes.
Dega e LDK-së në Sharr, përmes takimeve zhvilluar sëfundmi, përfshirë krerët e saj, e përgjatë ditës së djeshme edhe me kryetarin e komunës, na e thanë qartazi që nuk e kanë seriozisht ndryshimin në komunë, duke mos respektuar marrëveshjen për koalicionin qeverisës.
Ne jemi të bindur që vendimi ynë për ta dërguar PDK-në në opozitë ka qenë i duhur, i drejtë dhe mëse i nevojshëm. Ashtu sikurëse jemi të bindur që ndryshimi në komunë duhet të jetë substancial e përmbajtësor.
Meqë dega e LDK-së në Sharr nuk e ka seriozisht ndryshimin dhe shenjë për këtë është shkelja mbi parimet e marrëveshjes që mundësoi ndërrimin e qeverisjes në komunë, nuk ka më kuptim që si Lëvizje VETËVENDOSJE! të përfshihemi në një ekzekutiv të tillë komunal.
Jo se prisnim shumë më ndryshe, por mbështetja jonë, më shumë se sa për fitoren e LDK-së ishte përmbushje e një obligimi ndaj më shumë se 2300 votuesëve të cilët na deleguan përgjegjësi përtej së qëndruarit neutral në periudhën e balotazhit.
Ka shumë punë për ta arritur ndryshimin e vërtetë në komunën tonë. Lëvizja VETËVENDOSJE! në Sharr do të jetë në opozitë përgjatë 4 viteve të ardhshme, duke mbrojtur interesin publik e duke përcjellur me vëmendje secilin hap që do ndjekë qeverisja aktuale.
Qendra e Lëvizjes VETËVENDOSJE! Sharr, 11 janar 2022
