Dragash, 05 qershor 2026 – Kryetari i Komunës së Dragashit, Bexhet Xheladini, i shoqëruar edhe nga nënkryetari, Vetim Ramadani, vizituam të enjten fshatin Brezne për të parë nga afër ecurinë e punimeve që po realizohen në këtë fshat nga Komuna. “Gjatë vizitës u njohëm me progresin e projekteve të rëndësishme infrastrukturore, të cilat përfshijnë punime në infrastrukturën rrugore, kubëzime, asfaltime të pjesshme të rrugëve të dëmtuara, ndërtimin e mureve mbrojtëse, zgjerimin e rrjetit të ndriçimit publik, si dhe ndërtimin e impiantit për përpunimin e ujërave të zeza”, ka thënë Xheladini, duke shtuar se aktualisht në fshatin Brezne janë të angazhuara pesë kompani, të cilat, sipas tij, po punojnë intensivisht në realizimin e këtyre projekteve me rëndësi të veçantë për banorët dhe përmirësimin e kushteve për jetë më të mirë. “Përkushtimi ynë mbetet i pandryshuar për të vazhduar me investime konkrete në çdo pjesë të territorit të komunës sonë, duke krijuar infrastrukturë moderne dhe shërbime më cilësore për të gjithë qytetarët”, ka thënë Xheladini.
