Protesta e 9 Janarit – Sinjal për të reflektuar!

Prishtinë, 10 janar 2016 – Dhjetëra mijëra qytetarë të Kosovës morën dje pjesë në protestën që u organizua në Prishtinë nga partitë opozitare, e cila në përmbyllje të saj eskaloi në dhunë. Protesta e thirrur si paqësore, teksa po shkonte drejt përmbylljes, një grup të rinjsh nisën të hidhnin kokteje molotovi drejt ndërtesës së qeverisë.
Ndonëse organizatorët u munduan t’i qetësonin, përfshi këtu edhe deputetin e Lëvizjes Vetëvendosje, Rexhep Selimi, orvatjet për përmbajtje dështuan dhe shumë shpejt aktiviteti eskaloi në dhunë. Për pasojë, mbetën të lënduar policë, protestues dhe gazetarë. Policia e Kosovës, përmes një njoftimi për media, ka bërë me dije se ka arritur të arrestojë tridhjetë e katër protestues të dhunshëm, tek të cilët janë gjetur mjete të dyshuara, si thika, koktej molotovi e gjëra që ju kanë shërbyer për kamuflim. “Policia e Kosovës mbetet e përkushtuar në realizimin e detyrave dhe përgjegjësive të saja ligjore për ruajtjen e rendit dhe sigurisë publike si dhe vënies së situatës nën kontrolle”, thuhet mes tjerash në njoftimin e policisë.
Nga ana tjetër, Sami Kurteshi, nga Vetëvendosja, ka deklaruar se personat që shfaqën dhunë, nuk ishin të tyre. “Ata që gjuajtën ndërtesën e qeverisë dhe më pas edhe policinë, nuk ishin tanët por një grup i të rinjve të papërgjegjshëm që po dëshirojnë me prish”, është shprehur Kurteshi, duke shtuar se më kot ishin përpjekur t’i ndalonin.
Sido që të jetë, protesta e djeshme mblodhi më shumë se kurrë më parë qytetarë, gjë që nga analistët u konsiderua se kjo duhet të reflektojë edhe tek pozita por edhe tek opozita, për të gjetur një zgjidhje të pranueshme për dy palët, në mënyrë që vendi të ec përpara.