Siguria në Dragash vlerësohet pozitive – Elmazi e vlerëson katastrofale!

Dragash, 28 janar 2016 – Në mbledhjen e parë të Kuvendit të Komunës së Dragashit për vitin 2016, ndër pikat tjera ishte edhe ajo e çështjes së sigurisë në këtë komunë të skajshme të Kosovës, për ç’gjë ishte ftuar për të raportuar komandanti i Stacionit policor në Dragash, Shaqir Uka.
Shkas për këtë raportim ishte dukuria e vjedhjeve, ku u potencua se ato kanë ndodhur në qendrat më të mëdha të trevës së Opojës (Bellobrad, Brezne dhe Bresanë), si dhe në vendbanimet e Gorës që shtrihen rreth brezit kufitar me Shqipërinë. Në paraqitjen e parë, para anëtarëve të Kuvendit, komandanti Uka prezantoi statistika pozitive, ku në secilën prej pikave që prezantoi, kishte rënie të numrit të rasteve. “Gjendja e sigurisë në komunën e Dragashit është e qetë dhe stabile”, tha Uka, duke kërkuar nga qytetarët që të bashkëpunojnë më shumë me organet e rendit.
Të gjithë anëtarët e kuvendit u pajtuan se numri i vjedhjeve ka rënë kohët e fundit, përpos anëtares nga komuniteti pakicë, Zinaida Elmazi, e cila gjendjen e sigurisë në trevën e Gorës e paraqiti si katastrofale. “Për çfarë gjendje të mirë sigurie po flisni, kur banorët e Gorës nuk e bëjnë gjumin rehat, pasi ballafaqohen me hajna. Unë ju them se kufirin me Shqipërinë nuk e ruan askush dhe kjo ka bërë që hajnat të operojnë lirshëm”, tha anëtarja e kuvendit, nga radhët e partisë boshnjake VATAN, Zinaida Elmazi. Ndërkaq, anëtarët tjerë kërkuan nga komandanti i policisë më shumë detaje rreth punës së policisë në këto raste, si dhe u interesuan për rezultatin e hetimeve rreth sulmit që iu bë zëvendësit të tij, rast ky që ka ngelur enigmë tek banorët e kësaj ane. Komandanti Uka tha se rasti në fjalë i ka kaluar policisë rajonale, e cila po vazhdon punën rreth zbardhjes së tij, ndërkohë që për shëndetin e zëvendëskomandantit që u sulmua me thikë, Elam Seferit, Uka tha se është shëndoshë e mirë dhe se ai është kthyer në punët e përditshme në polici.