Duhël, 02 prill - Si pasojë e aksidentit të rëndë që ndodhi të mërkurën, në rrugën Prizren - Prishtinë, pak kilometra nga “Qafa e Duhlës”, drejtuesi i automjetit, M. Martinaj (30), ka ndërruar jetë në QKUK, në Prishtinë. Këtë e konfirmoi sot zëdhënësi i policisë në Prizren, Hazir Berisha, duke sqaruar se ky rast ka kaluar tek Prokurori Publik i Qarkut në Prizren, ndërsa trupi i pa jetë i viktimës u është dorëzuar familjarëve.
Aksidenti ka ndodhur, kur drejtuesi lëvizte me automjetin e tij, me targa të qytetit të Kralevës (Serbi), në drejtim të Prishtinës dhe si pasojë e shpejtësisë së madhe, e humb kontrollin mbi automjetin duke dalë nga rruga për tu përplasur me kodrën, jashtë rrugës, e më pas automjeti rrokulliset disa herë në rrugë. Për pasojë, drejtuesi i automjetit ka pësuar lëndime të rënda trupore, ndërsa bashkudhëtaret e tij, S. Likaj (30) dhe A. Lutaj (19) kanë marrë lëndime më të lehta.
Menjëherë pas aksidentit, drejtuesi është transferuar me automjetin e emergjencës së Suharekës në QKUK, ndërsa dy bashkudhëtarët e tij janë dërguar në spitalin Rajonal të Prizrenit, ku pas dhënies së ndihmës janë liruar për tretman shtëpiak.
Sipas hetuesve të këtij rasti, dyshohet se drejtuesi i automjetit, tashmë i ndjerë, nuk e kishte përshtatur shpejtësinë e lëvizjes me kushtet në rrugë. Hetuesit kanë kryer procedurat e duhura hetimore, nën mbikëqyrjen e prokurorit, i cili ishte në vendin e ngjarjes.
|