Lajmet BLIC - edicioni i dytë

• Rubrikat •

• Kërkimi i Shpejtë •

• Lidhjet Direkte •

• Publicitet •

• Publicitet •

• Publicitet •

• Publicitet •

• Dita e FLAMURIT •

edhe:

Gëzuar!

Më të Rejat

Më të Lexuarat

Lajmet BLIC - edicioni i dytë

e Premte, 29 Janar 2010 16:45

Dragash - Dje u mbajt mbledhja e parë e punës e Kuvendit Komunal të Dragashit, në të cilën u zgjodh sërish Lulzim Rifaj për kryesues të Kuvendit, ndërsa Sherif Aga, zv/kryesues. Në këtë seancë u formuan edhe dy Komitetet e domosdoshme komunale, ai për Politikë e Financa dhe Komiteti komunal për Komunitete.

Pika e tretë e rendit të ditës, e cila kishte të bënte me ndryshimin dhe plotësimin e Statutit të Komunës, u hoq nga rendi i ditës, me kërkesën e kryetarit të Komunës, Salim Jenuzi.

Ndërkohë, në këtë mbledhje u zgjodh edhe nënkryetari i Komunës, nga radhët e minoriteteve, post ky të cilin do ta vazhdojë edhe këtë mandat nënkryetari i gjertanishëm, Çasip Kushi.

Suharekë - Pas tri rundeve të votimit të fshehtë, Kuvendi Komunal i Suharekës ka zgjedhur për kryesues Vesel Maliqajn nga AAK-ja.

Kryesuesi i ri, pas marrjes së besimit nga delegatët, ka falënderuar ata për besimin që i kanë dhënë dhe është zotuar se do të punojë bashkërisht me të gjithë, edhe me ata që nuk e kanë votuar. “Do të punojmë bashkë dhe do të jem transparent me të gjithë, në interes të qytetarëve”, është zotuar Maliqaj.
Me shumicë votash është vendosur që në Komitetin për Politikës e Financa të përfaqësohen me nga tre përfaqësues PDK-ja, dhe LDK-ja, ndërsa me dy përfaqësues AAK-ja, dhe një LDD-ja.

Prishtinë - Fushata parazgjedhore për kryetarë të komunave të Prizrenit dhe Lipjanit, përfundon sonte në mesnatë. Në garë janë Partia Demokratike e Kosovës dhe Lidhja Demokratike e Kosovës.

Rivotimi në komunën e Prizrenit dhe të Lipjanit, u vendos për shkak të disa parregullsive që ndodhën në dy rundet e kaluara të zgjedhjeve.

Këto dy komuna hyjnë në rivotim të dielën, më 31 janar, në 86 qendra votimi dhe e 269 vendvotime. Ndërkaq, për komunën e tretë, atë të Gjilanit, pritet vendimi i autoriteteve përkatëse.

Prizren - Katër të mitur nga fshati Velezhë e Prizrenit, janë arrestuar nga policia, pasi janë kapur në flagrancë, duke thyer dyer të shkollës dhe ambulancës së fshatit Novakë, nga e cila janë marrë një sasi e medikamenteve.

Policia rajonale në Prizren ka njoftuar se edhe një qytetar, po ashtu ka informuar, se shtëpia e vëllait të tij, i cili aktualisht jeton në Serbi, është thyer dhe demoluar dhe se nuk dihet, nëse është vjedhur ndonjë gjë.

Të miturit janë intervistuar nga policia, në prani të prindërve, dhe, pas konsultimit me prokurorin, është vendosur që ata të ndalën në objektet policore.

Prizren - Pak pas mesnatës, në Xërxë, një i dyshuar ka dëmtuar dritat e pasme dhe ka gërvishtur një automjet të parkuar para shtëpisë së pronarit.

Posa është hetuar dëmi, pronari e ka paraqitur rastin në polici, e cila shumë shpejt ka identifikuar një person, i cili dyshohet ta ketë kryer këtë vepër.

I dyshuari është arrestuar, por nuk është intervistuar, ngase ishte nën ndikim të alkoolit. Prandaj, në konsultim me prokurorin, është vendosur që ai të mbahet në arrest.

Prishtinë - Ministria e Jashtme e Kosovës, nuk e ka parë të arsyeshme që të dërgojë delegacionin e saj në samitin e Unionit të shteteve Afrikane, i cili po i zhvillon punimet në Etiopi. Zyrtarë të kësaj ministrie kanë thënë se mosprania e delegacionit tonë atje, nuk është shkak i mungesës së vizave për delegacionin kosovar, ashtu siç kanë raportuar mediat serbe, të cilat kanë thënë se ministri Hyseni dhe anëtarët e delegacionit kosovar nuk kanë udhëtuar në kryeqytetin e Etiopisë, Adis Abeba, për shkak se autoritetet e atjeshme, me intervenimin e Serbisë, nuk kanë pranuar t'u japin viza në pasaportat e Kosovës.

Adis Abeba - Serbia apeloi tek shtetet afrikane që ta mbështesin përpjekjen e saj për të bllokuar njohjen diplomatike të Kosovës. “Kam ardhur sot këtu që t’ju ftoj t’i mbani parimet tuaja të rezervuara për çështjen e Kosovës”, u tha delegatëve ministri i Jashtëm serb, Vuk Jeremiq, në hapje të samitit vjetor të Unionit Afrikan, në kryeqytetin e Etiopisë, Adis Abeba.

Jeremiq u tha liderëve afrikanë se pavarësia e Kosovës do të përbënte kërcënim serioz për kontinentin e tyre, i cili sipas tij, ka shumë grupe rebele dhe luftëra civile.

Prishtinë - Kryeministri Hashim Thaçi iu premtoi dje përfaqësuesve të komunitetit serb, se qeveria e drejtuar nga ai, do të vazhdojë të mbështesë projekte që përfshijnë banimin, infrastrukturën, arsimin dhe promovimin kulturor të komuniteteve, derisa pjesëmarrjen e tyre në zgjedhjet lokale e konsideroi shumë domethënëse.

Këto komente, shefi i qeverisë i bëri në një Tryezë të rrumbullakët, organizuar me liderët politikë, deputetët dhe përfaqësuesit e zgjedhur serbë, ku mori pjesë edhe Përfaqësuesi Civil Ndërkombëtar, Pieter Feith.