Mustafa: Harroje Prizrenin, Hashim Thaçi! |
e Diel, 22 Shtator 2013 18:40 |
Prizren, 22 shtator 2013 - Lideri i LDK-së, Isa Mustafa, e ka paralajmëruar liderin e PDK-së, Hashim Thaçin, që ta harrojë Prizrenin. Ai tha se Prizreni, pas zgjedhjeve të 3 nëntorit, do të qeveriset nga kandidati i LDK-së, Eqrem Kryeziu. “ Thaçi nuk ka shans ta fitojë Prizrenin. Nga këtu po i them, që mos të mundohet më shumë, sepse Prizreni do të qeveriset nga LDK-ja”, tha Mustafa, i cili të dielën ka pirë kafe në sheshin “Shatërvan”, bashkë me kandidatin për kryetar të Prizrenit, Eqrem Kryeziun dhe kandidatët e LDK-së që garojnë për këshilltarë në Kuvendin e Komunës së Prizrenit.
Mustafa është shprehur i bindur, se kandidati i LDK-së, Eqrem Kryeziu, do t’i fitojë zgjedhjet në Prizren. Ndërkaq, vet Eqrem Kryeziu, tha se janë qytetarët e Prizrenit ata që po e dëshirojnë ketë ndryshim. “PDK-ja, kur erdhi në pushtet, pati premtuar ndryshime. Ata, jo vetëm që nuk i kanë bërë ato ndryshime, por e kanë harruar krejt këtë premtim. Prandaj janë qytetarët ata që tani po e duan ndryshimin në Prizren”, tha Kryeziu.
|